काठमाडौं। प्रधानमन्त्री वालेन्द्र शाहले निर्माण क्षेत्रका विद्यमान समस्या समाधान गर्दै विकास निर्माणका कामलाई समयमै सम्पन्न गराउन सरकार प्रतिबद्ध रहेको बताएका छन्।
बुधबार प्रधानमन्त्री तथा मन्त्रिपरिषद्को कार्यालयमा नेपाल निर्माण व्यवसायी महासंघका पदाधिकारीसँग भएको छलफलमा उनले निर्माण क्षेत्र मुलुकको आर्थिक विकास, रोजगारी सिर्जना र भौतिक पूर्वाधार निर्माणको प्रमुख आधार भएकाले यस क्षेत्रका व्यावहारिक समस्या समाधानमा सरकार गम्भीर रहेको बताए।
प्रधानमन्त्री शाहले निर्माण व्यवसायलाई मर्यादित, पारदर्शी, जिम्मेवार र परिणाममुखी बनाउँदै विकास आयोजनाहरू निर्धारित समयमै सम्पन्न गर्न सरकार, निजी क्षेत्र र सम्बन्धित निकायबीच प्रभावकारी सहकार्य आवश्यक रहेको उल्लेख गरे। साथै, निर्माण क्षेत्रको विश्वसनीयता र कार्यक्षमता बढाउन नीतिगत तथा प्रशासनिक सुधारलाई प्राथमिकता दिइने बताए।
छलफलका क्रममा नेपाल निर्माण व्यवसायी महासंघका पदाधिकारीहरूले सम्पन्न कामको भुक्तानीमा हुने ढिलाइ, आयोजनाको म्याद थप, ठेक्का व्यवस्थापन, मूल्य समायोजन, बैंकिङ सुविधा तथा लगानीसम्बन्धी समस्याबारे प्रधानमन्त्रीको ध्यानाकर्षण गराएका थिए। उनीहरूले निर्माण उद्योगलाई पुनः चलायमान बनाउन सरकार र निजी क्षेत्रबीचको सहकार्य अझ प्रभावकारी बनाउनुपर्ने धारणा पनि राखेका थिए।
जवाफमा प्रधानमन्त्री शाहले व्यवसायीहरूले उठाएका विषयमा सरकार गम्भीर रहेको उल्लेख गर्दै विकास निर्माणका काममा देखिएका अवरोध हटाउन सम्बन्धित निकायसँग समन्वय गरी आवश्यक नीतिगत सुधार अघि बढाइने विश्वास दिलाएका छन्।
प्रतिक्रिया
० प्रतिक्रिया