काठमाडौं । पूर्वाधार विकास मन्त्री सुनिल लम्सालको अभिव्यक्ति पुनः चर्चामा आएको छ। आइतबार तनहुँको शुक्लागण्डकी नगरपालिकामा सत्तारूढ राष्ट्रिय स्वतन्त्र पार्टी (रास्वपा) का नेता तथा कार्यकर्तासँगको भेटघाटका क्रममा उनले काम नगर्ने जनप्रतिनिधि र मन्त्रीमाथि समेत कारबाही हुने बताएका हुन्।
मन्त्री लम्सालले जनताको सेवामा लापरबाही गर्ने वा जिम्मेवारी पूरा नगर्ने मेयरविरुद्ध आवश्यक कारबाही गरिने बताए। उनले प्रदेशका मन्त्रीले पनि काम नगरे आफूहरू कारबाही गर्न पछि नपर्ने चेतावनी दिँदै सबैले जिम्मेवारीका साथ काम गर्नुपर्नेमा जोड दिए।
उनले भने, “कुनै मेयरले काम गर्नुभएन, जनतालाई अपहेलना गर्नुभयो वा सेवामा लापरबाही गर्नुभयो भने हामीलाई जानकारी गराउनुहोस्। मेयरलाई पनि कारबाही गर्छौं। प्रदेशका मन्त्रीले पनि काम गर्नुभएन भने उहाँलाई पनि थुन्छौं, चिन्ता लिनुपर्दैन। काम गर्नुपर्यो, काम गराउनुपर्यो।”
यसअघि पनि मन्त्री लम्सालले काम नगर्ने ठेकेदारहरूको “खुट्टा भाँच्ने” अभिव्यक्ति दिएका थिए। उक्त भनाइको व्यापक आलोचना भएको थियो। अहिलेको अभिव्यक्तिले पनि सामाजिक सञ्जालमा चर्चा र बहस सिर्जना गरेको छ।
प्रतिक्रिया
० प्रतिक्रिया