कैलाली। इलाका प्रहरी कार्यालय सुखडका प्रमुख प्रहरी नायब उपरीक्षक (डीएसपी) प्रसन्नराज चौधरीलाई सार्वजनिक कार्यक्रममा दिएको अभिव्यक्तिबारे स्पष्टीकरण लिन जिल्ला प्रहरी कार्यालय कैलाली बोलाइएको छ।
घोडाघोडी नगरपालिका–५ दरखमा आयोजित लागूऔषध सचेतना कार्यक्रममा उनले ‘हामी बालेनको पुलिस होइनौँ, नेपाल पुलिस हौँ’ भन्ने अभिव्यक्ति दिएका थिए। उक्त भिडियो सामाजिक सञ्जालमा भाइरल भएपछि जिल्ला प्रहरी कार्यालयले उनलाई घटनाबारे जानकारी लिन बोलाएको हो।
कैलालीका प्रहरी प्रमुख प्रहरी उपरीक्षक (एसपी) नरेन्द्र चन्दका अनुसार डीएसपी चौधरीलाई अभिव्यक्ति कुन सन्दर्भमा आएको हो भन्ने विषयमा सामान्य सोधपुछ गरिनेछ।
कार्यक्रममा चौधरीले नेपाल प्रहरी कुनै व्यक्ति वा सरकारको नभई कानुनको शासनअनुसार सञ्चालन हुने संस्था भएको उल्लेख गर्दै प्रहरीको निष्पक्ष भूमिकाबारे धारणा राखेका थिए। साथै, आफूहरू राजनीतिक पहुँच वा कुनै दलको समर्थनबाट नभई खुला प्रतिस्पर्धामार्फत प्रहरी सेवामा प्रवेश गरेको बताएका थिए।
कार्यक्रममा आफ्नो अभिव्यक्तिको भिडियो सार्वजनिक नगर्न आग्रह गरे पनि उक्त भिडियो सामाजिक सञ्जालमा व्यापक रूपमा फैलिएको थियो। त्यसपछि विभिन्न प्रतिक्रिया आउन थालेपछि जिल्ला प्रहरी कार्यालय कैलालीले उनलाई स्पष्टीकरणका लागि बोलाएको जनाएको छ।
प्रतिक्रिया
० प्रतिक्रिया